Sushi Cours doheem

Wéi een einfach ka selwer Sushi maachen

Sushi Cours doheem

Wéi een einfach ka selwer Sushi maachen

 

E Sushi-Cours bei engem doheem, dat versprécht eppes Extras ze sinn. De Boris vun der Academie Culinaire offréiert dat zënter Joere mat grousser Begeeschterung a Succès.

 

Ech kennen de Boris praktesch zënter éiweg - net grad genee esou laang, awer mir hunn schonn an der Sandkaul zesumme Sandkuche gebak. An ech wollt och erliewen a léiere wéi ee Sushi mëscht.

Also koum hie bei eis heem. Ronn eng Stonn ier de Cours u sech ufänke sollt, koum de Boris an huet alles preparéiert. Hie bréngt alles mat ausser den Dësch, d’Still, d’Gedrénks an d’Leit déi eppes léiere wëllen. Déi puer Saachen an d’Kollegen hunn ech missten organiséieren. Et brauch e mindestens 5 Leit an am beschten och net ze vill, soss fäerten ech ass een als Gastgeber just am gaange ronderëm ze bësele fir datt et jidderengem gutt geet. Mir waren zu siwen. Dat war eng gutt Zuel.

 

Wou jiddereen do war an ob senger Plaz souz - et ass en Cours, also muss jiddereen ob senger Plaz setzen - ass et lass gaangen. De Boris huet sech kuerz virgestallt an dunn ass ganz vill Theorie komm. Mir kruten immens vill iwwert de Sushi, de Fësch an natierlech de Reis erkläert. Nodeems och all eis Froe beäntwert waren ass et richteg lass gaangen. Mir hunn alleguer eis Hänn gewäscht an eise Sushi Schrëtt fir Schrëtt gemaach.

 

Mir hu mat “normalen” Maki ugefaangen. Bei de Maki ass baussen en Algen-Blat, dann de Reis a banne wat e gären huet - bei mir ëmmer Saumon. Nom Maki gouf et dann e bëssche méi komplizéiert a mir hunn eis éischt California-Rolls gemaach. Déi waren och immens lecker. Wëll am Boris senge Cours’e muss natierlech alles selwer geschmaacht ginn. An zum Schluss krute mir nach erkläert wéi een e gudden Onigiri zaubert. Dat ass ob alle Fall net esou einfach wéi et ausgesäit, wann een se um Teller gesäit.

 

An deene puer Stonnen hu mir immens vill geléiert a grad esouvill, wann net esouguer méi, gejickt. Alles ass duerch eis intern Qualitéitskontroll gaangen... An et war wierklech alles immens lecker.

 

Mee wéi keent een ob déi Iddi fir de Leit bei ze brénge wéi ee Sushi mëscht. Natierlech huet de Boris eis dat och am Detail erkläert. U sech huet hien zu Toulouse ob der Uni studéiert. Nee, dat war näischt mat Fësch a Reis. Ugefaangen huet et schonns am Süde vu Frankräich. Do huet hien duerch säi Sushi Meeschter, japanesch Messeren entdeckt. No sengem Studium huet hien dunn Messeren aus Japan importéiert an heiheem verkaf. Doduerch erëm koum en un e japanesche Restaurant zu New York, op der anerer Säit vum grousse Pull. Do huet hien dann och geschafft. An du wou de Boris nees an d’Heemecht koum, huet hien dann 2010 ugefaangen de Leit ze weise wéi ee Sushi selwer meescht.

 

Méi Informatioune fënnt een op der Internetsäit vun der Academie Culinaire.

 

About the author

Nico Brettner

Ech, Nico, kommen aus der Mëtt vun de 70er a liewe mat menger léiwer Fra an eisen 2 Kanner am Süden (just am Süde vu Lëtzebuerg).

Mat enger ganz grousser Portioun Optimismus (ech mengen do sinn ech als Kand an e Zauberdëppe voll Optimismus, getrollt) an ëmmer gudder Laun probéieren ech mäin Alldag als Hallefzäit Hausmann an Informatiker ze meeschteren.

Zënter ëmmer kämpfen ech mat Fieder a Bläistëft fir eng nach besser Welt a säit 2008 schreiwen an illustréieren ech Bicher an Artikelen.