D'Bomi ass dout

E Buch vum Jos Kayser

Den Titel léist op eppes anescht schléissen wéi op eng Schachnovell. An och wann dëst op dem Buchcover dropsteet, gëtt een éischter heivun feel geleet. Well dëst Buch kann een wuel an keng Kategorie, keen Tirang stiechen. 

Wann och den Titel op dat tragescht Ofliewen vun der Boma hiweist, verleet de Rescht vun der Geschicht gréisstendeels éischter zum schmunzelen. Méi wéi eemol kann ech mir beim Liesen Zeenen bildlech gutt virstellen. An et kënnt mir d'Iddie an de Kapp, dat dëst Buch eng fantastesch Virlag vir en Theaterstéck géif ginn.


Awer elo zu der Geschicht: net nëmmen bei sengem Numm schéngen dem Julien seng Elteren keng glécklech Hand gehat ze hunn. Mee och bei der Wiel vum Vakanzenziel an bei der Reesbegleedung. Et geet op Belsch Plage...mat der Bomi... Abee vun der éischter Minutt un leeft et net säi richtegen Wee. 



Ech konnt mir definitiv net verknaifen, den Auteur ze froen, wei dës droolesch Geschicht zustane koum.

Wat ass d'Basis vir deng Geschicht ?
D'Basis ass eng deels real deels fiktiv Geschicht, déi an eiser Famill kurséiert. Witzegerweis krut ech vun anere Leit ähnlech Geschichten erzielt, wéi ech bis ugefaange hunn vu mengem Buch-Projet ze schwätzen.
Och elo, nodeems déi éischt Lieser mir hir Reaktioun matdeelen, kommen ëmmer méi där Anekdoten un d'Dagesliicht.
Mir sinn och op d'Belsch Plage gefuer (allerdéngs mam Zuch, mee mäi Papp hat tatsächlech och e Keefer), d'Pensioun Joseph gouf et och op der Digue, an ech hu vill Schach gespillt, als Kand an als Jugendlechen.
 

Kleng Umierkung vun mir: ons éischt Vakanz wuer, wéi kéint et anescht sinn, Belsch Plage an mir sinn gereest, ... elo net laachen... mat engem Keefer. Mee ab do halen d'Parallellen...ausser enger Pensioun...op.

Wei bass du op eng Schachnovell komm? Oder anescht gefrot, wei géifs du d'Geschicht beschreiwen?
Als begeeschterte Lieser vum Stefan Zweig huet mech natierlech séng "Schachnovelle" immens intrigéiert. Hien huet dat "Format" quasi erfonnt. Et wär allerdéngs vermiessen ze behaapten, et géif iergendwellech Parallellen. Ech géing mer ni umoossen, dem Stefan Zweig wëllen d'Waasser ze reechen. Mee et gëtt eng Partie Stilelementer, déi och aus dëser Geschicht eng Schachnovell maachen. De roude Fuedem ass d'Schachbegeeschterung vum Haaptprotagonist. Dëse kämpft och mat senger Identitéit, ass an der Isolatioun vu senger Famill gefaange a sicht en Auswee fir auszebriechen.

Wisou spillt se an den 70er Joren?
D'Schachweltmeeschterschaft tëscht dem Boris Spasski an dem Bobby Fischer war e weltwäit Evenement. Et war d'Fortsetzung vum kale Krich um Schachbriet. Dat huet deemools all Schachbegeeschterten enorm gefesselt. Den Timing, deen ech a meng Geschicht iwwerholl hunn, d'Detailer vun de Matcher an d'Geschéie ronderëm, entspriechen der Realitéit. Dat hunn ech alles nogesicht an an d'Geschicht afléisse gelooss. Dat war 1972.

Et wier e gutt Theaterstéck deng Geschicht, hues du an déi Richtung Ambitiounen?
Net wierklech. Ech hätt awer näischt dergéint wann een et wéilt adaptéieren an opféieren. Do géing ech och mat hëllefen. Mee am Moment hunn ech genuch mat Schreiwen ze dinn, an ech hunn nach vill Iddien am Kapp.

Wat war dat wat dir am beschten un deem ganzen gefall huet?
D'Intrig. An de Schluss. De Lieser ass, och duerch den Titel, op den Dout vun der Bomi fixéiert. D'Geschicht ass awer déi vum Julien a wéi en aus sengem Liewen kann ausbriechen.
Et kann een dem Buch zwou verschidde Liesarte ginn: ganz einfach déi lëschteg Geschicht, déi een zum Laache bréngt, eegen Vakanzerrënnerungen ervirbréngt, oder et als Sozialkritik gesäit, wéi et am klengbiergerlechen (Aarbechter-Milieu) Familjekosmos zu där Zäit gespillt huet. Bei allem Gäiz, bei alle Klassenënnerscheeder, d'Verlaangeren no deem "Aneren" ass einfach ze grouss, fir dem Reiz net ze ënnerleien (friem goen, der Schwéiermamm den Dout wënschen, de Papp erpressen ...).

Hues du schonns däi nächsten Projet am Kapp? 
Am Moment sichen ech e Verlag, dee mäin "récit poétique" "Toujours jamais" verëffentlecht. Dat ass fir e lëtzebuergeschen Auteur zimlech schwiereg. Mee ech ginn et net op, well et ass eng Geschicht, déi mir enorm um Häerz läit. Et ass och e Roman op franséisch an der Maach, mee et ass nach ze fréi, fir doriwwer ze schwätzen.

Merci villmools un den Auteur Jos Kayser!
 

Wien elo dëst aussergewéinlecht d'Buch gewannen well, kann bei mir op menger Facebook Säit eraluussen an ënert dem Post vum Buch een Kommentar loossen an deem e mer seet wou seng éischt Vakanz hingoung an op et mam Käfer, mat soss engem Auto, mam Bus oder och mam Flieger war. Dëst Gewënnspill geet bis de 15. Juni 2018.

D'Bomi ass doud
ISBN : 978-99959-36-57-0
13,50 €

About the author

Martine
Martine

Musik, Natur, Sport, Kunst und Kultur und vor allem Lesen. Dies sind einige meiner vielen Interessen. Geboren in Luxemburg und wohnhaft im Westen, bin ich in der Mitte des Lebens angekommen und genieße dessen Vielfalt jeden Tag aufs Neue. 

Die Literatur ist für die Menschheit das, was Träume für den Einzelnen sind. Isabel Allende